Laoch ar lár

Dé Luain, an 9ú Samhain 2026


Tá brón ar mhuintir na hÉireann le seachtain anuas ó chuala muid an scéal truacánta gur imigh Ciara Mageean (nó, Nic Gaoithín) ar shlí na fírinne. Reathaí iontach ó Chontae an Dúin ab ea Ciara. 

(Ciara ag rith sna Cluichí Oilimpeacha i dTokyo, 2021)


Is minic a chuir sí an-áthas ar mhuintir na hÉireann nuair a bhain sí bonn cré-umha, airgid nó óir amach ag mórchomórtais Eorpacha agus Domhanda, agus ba dhíol mórtais dúinn í. 


Agus í ag rith ar son na tíre, ghnóthaigh sí go leor bonn agus moltaí thar na blianta. Thosaigh sí amach ar fhoireann reathaíochta na hÉireann agus í 17 mbliana d’aois i 2009. An bhliain chéanna, ghnóthaigh sí an dara háit sa rás 800m i gComórtas Reathaíochta Domhanda na nÓg.  

(Ciara ag rith ar son na tíre in 2009)


In 2024, d'éirigh léi a bheith ina curadh Eorpach sa rás 1,500 méadar ag Craobh na hEorpa, nuair a bhí sí tríocha bliain d'aois. San iomlán, tá 6 churiarracht náisiúnta aici sa reathaíocht mar an bhean is gasta riamh in Éirinn ag an mhíle, 800m, 1000m agus 1,500m. Chomh maith leis sin, bhain sí an t-am is gasta riamh amach ag ‘Parkrun’ mar an bhean is gasta ar domhan thar 5km in 2023 i mBéal Feirste. 

(curadh na hEorpa)


Bean óg chróga, chroíúil agus umhal a bhí inti. Bhí sí i gcónaí cairdiúil, cainteach agus sásta am a chaitheamh le daoine óga chun iad a spreagadh agus le lúthchleasaithe faoi mhíchumas le hiad a mholadh. 

(Spreag Ciara reathaithe óga)


Ní raibh an bóthar i gcónaí furasta do Chiara. Bhí uirthi dul i ngleic le go leor gortuithe roimh chomórtais mhóra, ach níor ghéill sí riamh. Lean sí uirthi ag obair go crua ar a cuid traenála. Léirigh sí do gach duine go dtagann torthaí maithe nuair a chreideann tú ionat féin agus nuair a dhéanann tú do dhícheall, d’ainneoin deacrachtaí.

(Ciara ag teacht ar ais chuici féin i ndiaidh di bheith gortaithe, 2018.)


Bhí an-suim ag Ciara riamh sa spórt. Chomh maith le bheith ina reathaí, d’imir sí camógaíocht ó aois óg, agus bhí spéis mhór aici i gcúrsaí CLG.Tá an tír ar fad faoi bhrón ó fuair sí bás ar na mallaibh, i ndiaidh di troid go cróga i gcoinne na hailse. Tháinig slua ollmhór go dtí a tórramh chun ómós a thabhairt don laoch spóirt seo, a raibh ardmheas ag gach duine uirthi.  

(Ciara lena foireann camógaíochta agus í óg)


Tá sí curtha anois go síochánta i bPórt an Pheire, a baile dúchais agus áit a raibh a croí ann go síoraí. Cé nach bhfuil sí linn níos mó, mairfidh an chuimhne ar a meangadh mór gáire agus ar an dea-shampla a thug sí de chrógacht agus dícheall. Leaba i measc na n-aingeal agus na naomh go raibh aici. 

(Port an Pheire, baile duchais Chiara)


Ceisteanna

  1. Cén contae as ar tháinig Ciara Nic Gaoithín?
  2. Cá mhéad bliain d’aois a bhí sí nuair a thosaigh sí amach ar fhoireann reathaíochta na hÉireann?
  3. Ainmnigh dhá fhad rása ar bhain sí curiarracht náisiúnta amach iontu.
  4. Cén spórt eile a d’imir sí ó aois óg diomaite den reathaíocht?
  5. Cá bhfuil sí curtha anois?


Le plé agus le déanamh

  • Póstaer Eolais: Dear póstaer eolais faoi Chiara Nic Gaoithín. Luaigh cuid de na comórtais / curiarrachtaí a bhain sí amach. 
  • Agallamh: Ba mhinic Ciara ag caint ar an teilifís. Scríobh 4 nó 5 cheist a chuirfeá ar Chiara dá mbeadh deis agat agallamh a dhéanamh léi ar an teilifís.
  • Cárta Comhbhróin / Ómóis: Scríobh teachtaireacht ghearr ómóis nó cárta comhbhróin do mhuintir Chiara ag moladh a cuid éachtaí.
  • Taighde ar Laoch Spóirt Eile: Scríobh alt gairid (5-8 abairt) faoi laoch spóirt eile as Éirinn a spreagann tusa.



Creidiúintí

meas