Cá háit a bhfuil tú ag iarraidh dul?
An bhfaca tú solas nó rud saoithiúil ag eitilt sa spéir riamh? Má bhí tú cinnte nach eitleán a bhí ann ná éan ná réalta, ná rud ar bith a d’aithin tú . . . chonaic tú úfó! Is minic a fheiceann daoine rudaí a bhíonn ag eitilt nach n-aithníonn siad agus cuid mhór den am, bíonn míniú ann, cé nach dtuigeann siad é sin ag an am. Ach tá líon beag rudaí nach bhfuil míniú ar bith ann dóibh agus inniu, Lá Domhanda Úfónna, tá cead agat an cheist a chur: ‘An mbíonn neacha ó phláinéad eile ag tabhairt cuairt ar an Domhan?’
Rainse caorach
An lá seo, an 2ú Meitheamh, thiar sa bhliain 1947, tharla ceann de na mistéirí is mó a bhaineann le húfónna. Tharla an scéal taobh amuigh de Chathair Roswell, i New Mexico. Tháinig feirmeoir ar smionagar ar a rainse i ndiaidh stoirme. Chuir sé in iúl don arm agus tháinig siad leis an smionagar a sheiceáil. D'fhógair an t-arm go raibh siad i ndiaidh ‘diosca eitilte’ a fháil agus chreid daoine gur spáslong as pláinéad eile a bhí ann. Ach, an lá dár gcionn, chuaigh an t-arm siar ar a scéal agus dúirt siad gur ‘balún aimsire’ a bhí ann.
Tá clú agus cáil ar Roswell as an eachtra a tharla i 1947
Ó shin i leith, tá daoine ann a shíleann go bhfuil níos mó eolais ag an rialtas faoi na réada eitilte seo ná mar a thugann siad le fios. Iarrann siad orthu an t-eolas uilig atá acu a roinnt leis an phobal. Agus, ar bhealach, sin an rud atá Rialtas Stáit Aontaithe Mheiriceá a dhéanamh le cúpla mí anuas.
Pictiúr d’úfó a d’eisigh Rialtas SAM an mhí seo caite
D’eisigh siad na céadta tuairisc agus físeán de réada eitilte gan aithint agus deir siad nach féidir leo iad a mhíniú. Ar a bharr sin, deir siad go bhfuil cuid de na rudaí seo ag eitilt chomh gasta sin nach féidir gur rudaí iad a rinne daoine daonna. Cad é a shíleann tú féin, an bhfuil neacha ó phláinéad eile ag tabhairt cuairt orainn?
Bíonn cuid mhaith de na pictiúir d’úfónna doiléir
Ceisteanna:
1. Cén cheist mhór atá luaite sa scéal seo?
2. Cén dáta a cheiliúrtar Lá Domhanda na n-úfónna?
3. Cén stát ina bhfuil Roswell?
4. Cad é a d’aimsigh feirmeoir ar a rainse?
5. Cé a tháinig leis an smionagar a sheiceáil?
6. Cad é an scéal nua a bhí ag an arm an lá dár gcionn?
Le déanamh:
Mar rang, déan liosta de na gnáthrudaí is féidir a bheith ann nuair a shíleann daoine go bhfaca siad úfó.
Samhlaigh go bhfaca tú úfó. Scríobh tuairisc faoi (cén áit a raibh tú, cén t-am den lá a bhí ann, an raibh sé geal nó dorcha, an bhfaca duine ar bith eile é, srl).
Is féidir agallamh a dhéanamh in áit tuairisc a scríobh. Beidh beirt de dhíth, duine amháin a chonaic an t-úfó agus tuairisceoir a chuireann ceisteanna mar seo thuas ar an duine sin.
Le plé:
Feiceann daoine úfónna agus ní gá gur neacha ó phláinéad eile atá iontu. Cad é an míniú atá ag an rang ar an scéal?
Pictiúir:
Roswell: Steve Lagreca / Shutterstock.com
Leathanach baile!
Leathanach baile nuachta
Léigh leabhar
Folláine
Faigh cúnamh
