logo Nuacht Anois

 

Taisteal

Déardaoin, an 14ú Bealtaine, 2026
(le Gráinne Uí Loingsigh)


Cad é mar a bhíonn daoine ag bogadh ó áit go háit? Tá go leor bealaí difriúla ann le turas a dhéanamh.


Cén dóigh ar tháinig tú chun na scoile inniu? Ar shiúil tú? Ar tháinig tú sa charr nó ar an bhus? Ar tháinig tú ar do rothar nó ar scútar?


Amharcfaidh muid anois ar dhóigheanna éagsúla le bheith ag taisteal.


Carr

Caithfidh páistí suí ar chathaoir speisialta sa charr. Caitheann tú crios sábhála.


Is féidir le cúigear nó fiú seachtar taisteal le chéile i gcuid carranna! Glacann an carr thú díreach chuig an áit ar mhaith leat dul.


Bus

Is féidir le cuid mhaith daoine bheith ag taisteal ar bhus le chéile. Leanann an tiománaí busbhealach áirithe agus is féidir leat imeacht ón bhus ag cibé stop ba mhaith leat ar an bhealach sin.


Rothar

De ghnáth, bíonn duine amháin ar rothar amháin. Caitheann tú clogad agus tú ar rothar le do chloigeann a choinneáil sábháilte má thiteann tú den rothar. Bogann tú an rothar le do chosa.

Scútar

Bíonn tú i do sheasamh ar an scútar agus bogann tú é le cos amháin. Tá seo maith má tá tú ag déanamh turas gairid. Is maith le cuid páistí teacht ar scoil ar scútar.


Traein

Is féidir le cuid mhór daoine bheith ag taisteal ar an traein le chéile. Cosúil leis an bhus, leanann an traein bealach áirithe. Stopann an traein i stáisiún traenach.


Is féidir leat imeacht ón traein ag cibé stáisiún traenach ba mhaith leat ar an bhealach. Ní bhíonn an traein ag taisteal ar bhóthar cosúil le carr nó bus, bíonn sé ag taisteal ar an iarnród.


Eitleán

Bíonn eitleán ag taisteal sa spéir! Is féidir leat bheith ag taisteal go tír eile ar eitleán.


Bíonn píolóta i mbun an eitleáin.


Bád

Bíonn bád ag taisteal ar uisce. Thig le bád turas gairid a dhéanamh ar loch nó ar abhainn.

(Báid Reachlainne - pic le Purplesky 123/Shutterstock.com)


Tá báid mhóra agus bheaga ann. Tugaimid long ar bhád mór. Is féidir le long turas fada a dhéanamh go tíortha eile.

(long mhór - pic le Peter Titmuss/Shutterstock.com)


Bíonn captaen i gceannas ar an long.

(captaen na loinge - pic le Stuart Perry/Shutterstock.com)


Nach bhfuil a lán bealaí éagsúla ann le bheith ag taisteal? Cad é an dóigh is fearr leatsa le bheith ag taisteal?


Ceisteanna Tuisceana

  1. Cén bealach taistil a théann sa spéir?
  2. Cad é a chaitheann tú ar do chloigeann nuair a bhíonn tú ar do rothar le bheith sábháilte?
  3. Cén áit a mbíonn bád ag taisteal?
  4. Cad é an t-ainm a thugtar ar bhád atá mór?
  5. Cé a bhíonn i mbun an eitleáin?
  6. Bíonn an carr agus an bus ag taisteal ar an bhóthar, ach cad é a mbíonn an traein ag taisteal air?
  7. Cad é a chaithfidh tú a chaitheamh nuair a bhíonn tú i gcarr?
  8. Cá mhéad bealach difriúil taistil atá luaite san alt?


Le plé nó le déanamh

  • Tarraing & Inis: Tarraing pictiúr den bhealach taistil is fearr leat as an alt (mar shampla: an carr, an bus, an t-eitleán, nó an long) agus abair cén fáth ar fearr leat é.
  • Rangú: Gearr amach nó tarraing pictiúir de gach bealach taistil ón alt. Ansin, cuir na pictiúir i dtrí ghrúpa:

🛣️ iad siúd a bhíonn ag taisteal ar an bhóthar,

🌊 iad siúd a bhíonn ag taisteal ar uisce, agus

🛫 iad siúd a bhíonn ag taisteal sa spéir.

  • Rólimirt & míniú: Amharc ar na focail atá scríofa le cúlra bándearg sa téacs. An féidir leat iad a mhíniú i do chuid focal féin? An féidir leat iad a léiriú le bréagáin nó le gluaiseachtaí (leat féin nó iarr ar do chairde cuidiú leat). 


meas