Cá háit a bhfuil tú ag iarraidh dul?
An Pápa Proinsias
D’fhág an Domhan slán leis an Phápa Proinsias, Dé Sathairn. Bhí ceannairí ó 130 tír i láthair ag an tórramh sa Vatacáin sa Róimh. Is stát í an Vatacáin agus bíonn an Pápa ina cheannaire ar an stát sin chomh maith le bheith ina cheannaire ar an Eaglais Chaitliceach. Bhí Uachtarán na hÉireann, Michael D Ó hUiginn, i láthair, chomh maith leis an Uachtarán Trump ó na Stáit Aontaithe, Keir Starmer, Príomh-Aire na Breataine agus an tUachtarán Macron as an Fhrainc.
Cailleadh an Pápa ar Luan na Cásca, i ndiaidh dó bheith tinn ar feadh tamaill. Bhí sé 88 bliain d’aois.
An chónra os comhair cheannairí an Domhain
Ní ócáid do cheannairí amháin a bhí ann nó bhí thart ar 400,000 duine i láthair. Chaith an Pápa Proinsias saol simplí agus chuidigh sé le daoine bochta agus le teifigh. Shíl a lán daoine gur lean an Pápa sampla Íosa.
Michael D Ó hUiginn, Uachtarán na hÉireann
Agus searmanas simplí a bhí ann chomh maith. An tseachtain seo a chuaigh thart, cuireadh corp an Phápa i gcónra adhmaid agus thug 250,000 duine cuairt air i gCearnóg Pheadair sa Vatacáin. Ansin, Dé Sathairn, chuir an Cairdinéal Re tús leis an tórramh. Labhair sé faoi shaol Phroinsias agus thug an slua bualadh bos.
Daoine i scuaine le slán a fhágáil le Proinsias
I ndiaidh an tórraimh, cuireadh an chónra ar Mhótar an Phápa, nó an ‘popemobile’, agus rinne sí a bealach go dtí Baisleac di Santa Maria Maggiore sa Róimh. Cuireadh an Pápa ansin.
Bhí na céadta míle duine i láthair ag an tórramh
Beidh roinnt laethanta de phaidreacha ag an eaglais agus ansin, ar an 7ú Bealtaine, socróidh na cairdinéil atá faoi aois 80 cé a bheas ar an chéad phápa eile. Tugtar ‘comhthionól cairdinéal’ ar an chruinniú seo de chairdinéil nó ‘conclave’.
Bhí na Cairdinéil uilig i láthair
Leanann na cairdinéil de bheith ag vótáil go dtí go bhfaigheann duine éigin 66% den vóta. Le linn an ama sin, ní bhíonn cead ag na cairdinéil labhairt le duine ar bith taobh amuigh. Ní bheidh a fhios againn cé a bheas ina phápa nua go dtí go bhfeictear an toit bhán ag teacht as simléar ar an Séipéal Sistíneach. Ag an am sin, tagann cairdinéal amach ar bhalcóin i gCearnóg Pheadair agus deir ‘Habemus papam’ – ‘Tá Pápa againn’. Tagann an Pápa nua amach ag an phointe sin agus bíonn a fhios againn uilig cé hé an Pápa nua.
Le déanamh:
Léigh tuilleadh faoin Phápa Proinsias anseo.
Don mhúinteoir:
Scéal Drámaíochta – ‘Habemus Papam!’
Aidhm: Tuigbheáil ar phróiseas tofa an Phápa trí rólghlacadh agus drámaíocht.
Treoracha:
1. Roinn an rang i ngrúpaí beaga (8-10 bpáiste an grúpa).
2. Tabhair treoir dóibh le dráma beag a dhéanamh ar an comhthionól cairdinéal, ag críochnú leis an toit bhán agus an Pápa nua ag teacht amach.
3. Caithfidh gach dráma na gnéithe seo a bheith ann:
• Tús an chomhthionóil – cairdinéil ag plé.
• An vóta – b’fhéidir i bhfolach, le páipéir.
• Teacht na toite báine.
• Fógairt: ‘Habemus papam!’
• Pápa nua ag labhairt leis an slua.
(Thiocfadh leis na daltaí comhráití beaga idir na ‘cairdinéil’ a chumadh chomh maith).
Mar chuid den dráma – smaoinígí ar na tréithe a bheadh de dhíth ar an duine le go ndéanfadh sé pápa maith.
Pictiúir:
An Pápa ag gáire: Fabrizio Maffei/Shutterstock.com
Cónra (x2): Marco Iacobucci Epp / Shutterstock.com
Cairdinéil: Marco Iacobucci Epp / Shutterstock.com
Slua i gCearnóg Pheadair: Marco Iacobucci Epp / Shutterstock.com
Michael D Ó hUiginn: Damien Storan / Shutterstock.com
Leathanach baile!
Leathanach baile nuachta
Léigh leabhar
Folláine
Faigh cúnamh