Cá háit a bhfuil tú ag iarraidh dul?
An mothaíonn tusa tinn agus tú sa charr?
An maith leatsa bheith ag taisteal sa charr? Éiríonn a lán daoine tinn má bhíonn orthu turas fada a dhéanamh sa charr nó ar an bhus – go háirithe páistí. Go fiú daoine nach n-éiríonn tinn de ghnáth, ní thiocfadh leo leabhar a léamh sa charr, nó chuirfeadh sé sin tinneas taistil orthu.
Éiríonn a lán daoine tinn má bhíonn siad ag léamh sa charr
Bhuel, anois, síleann eolaithe sa tSeapáin go bhfuil leigheas acu ar an tinneas taistil. Níl le déanamh ach éisteacht le fuaim speisialta ar feadh thart ar bhomaite gach lá!
Tarlaíonn an tinneas taistil nuair a fhaigheann d’inchinn teachtaireachtaí contrártha ó do shúile agus ó do chluasa. Mar shampla, agus tú ag léamh sa charr, feiceann do shúile nach bhfuil an leabhar ag bogadh ach mothaíonn do chluas inmheánach go bhfuil tusa ag bogadh – cuireann sé seo d’inchinn trína chéile!
Tá jab speisialta ag do chluasa. Ní hamháin go n-úsáideann tú iad don éisteacht, cuidíonn siad leat tú a choinneáil ar do chothrom fosta! Tá an chluas inmheánach mar a bheadh leachtleibhéal ann – sin rud a úsáideann tógálaithe lena chinntiú go mbíonn rudaí cothrom.
Leachtleibhéal – úsáideann tógálaithe iad lena fheiceáil an bhfuil rudaí cothrom
Tá leacht i do chluas inmheánach (go díreach cosúil le leachtleibhéal) a bhogann nuair a thiontaíonn tú nó nuair a chlaonann tú do cheann. Ligeann sé seo don inchinn an chuid eile de do chorp a bhogadh mar is ceart le tú a choinneáil ar do chothrom, le nach dtitfidh tú!
Cuidíonn an leacht i do chluas inmheánach leat tú a choinneáil ar do chothrom
Fuair na heolaithe amach go gcuidíonn sé go mór linn éisteacht le fuaim ar mhinicíocht speisialta (100hz) ar feadh 1 bhomaite sula n-imímid sa charr. Deir siad anois go ndéanfaidh siad níos mó oibre lena fheiceáil an oibreoidh an cleas céanna leis an tinneas farraige nó an tinneas aeir.
Gach seans go gcuideoidh obair na n-eolaithe seo leis na mílte mílte páiste ar fud an domhain a bhíonn tinn sa charr!
Tomhaisimid fuaimeanna (nó minicíocht fuaimeanna) in heirts nó hz. Má bhíonn méid beag hz ann, ciallaíonn sé sin go bhfuil an mhinicíocht íseal, agus, go bhfuil an fhuaim sin íseal.
Baineann an mhinicíocht le cé chomh minic is a thagann na tonnta fuaime – cé chomh minic gach soicind, mar shampla.
Má bhíonn líon ard tonnta ann, sin minicíocht ard agus fuaim ard.
Ní bhaineann minicíocht le cé chomh láidir nó cé chomh ciúin is atá an fhuaim. Agus muid ag caint ar fhuaimeanna, baineann íseal le fuaimeanna cosúil le fuaim an olldoird, thíos. Baineann ard le fuaimeanna cosúil le ceol na n-éan, nó fuaim feadóige, nó fuaim na fidile thíos.
Bíonn minicíocht íseal (idir 41 agus 300hz) ag an olldord, agus minicíocht ard (idir 196 agus 3,000hz) ag an fhidil
Freagair na ceisteanna seo – cuir tic sa bhosca chuí
Le plé / le déanamh
An dtagann tinneas taistil ortsa? Cad iad na cleasa a úsáideann tú féin le nach mbeidh tú tinn?
An raibh tú riamh ar bhád? Ar tháinig tinneas farraige ort? Cad é a rinne tú?
Leathanach baile!
Leathanach baile nuachta
Léigh leabhar
Folláine
Faigh cúnamh