Cá háit a bhfuil tú ag iarraidh dul?
Gach aon bhliain, bíonn comórtas mór ann le ‘Grianghrafadóir Faoi Uisce na Bliana’ a aimsiú. I mbliana, tháinig 6750 iontráil isteach – seo thíos cuid de na grianghraif ab fhearr.
Alvaro Herrero (Mekan)/UPY 2025
Seo an grianghraf a bhain an comórtas ar fad. Is grianghrafadóir as an Spáinn darb ainm Alvaro Herrero a thóg é. Seo míol mór dronnach agus an t-óg s’aici ag snámh suas go dromchla na farraige le hanáil a tharraingt, an chéad rud ar maidin. ‘Tchí muid bolgáin ag teacht amach as an mhíol mhór óg, b’fhéidir go bhfuil sé go fóill ag foghlaim an dóigh le smacht a choinneáil ar an análú,’ arsa Alvaro. Tógadh an grianghraf seo i ndeisceart an Aigéin Chiúin.
David Alpert/UPY2025
Léiríonn an grianghraf seo nach gcaithfidh tú dul chuig an taobh eile den domhan le pictiúr maith a fháil faoin uisce. Tógadh an pictiúr seo de rón fiosrach amach ó chósta theas Shasana. Tá go leor de na rónta seo le fáil amach ó chósta na hÉireann.
Ruruka/UPY 2025
Tógadh an grianghraf seo i bpluais in Cancun, Meicsiceo. Thaistil an grianghrafadóir 2,000 míle ón Choiré leis an ghrianghraf a thógáil agus d’fhan sé go dtí an séasúr fliuch, le go ndéanfadh an fhearthainn na dathanna in uisce na pluaise níos fearr!
Abdulaziz Al Saleh/UPY 2025
D’fhan an grianghrafadóir cúpla seachtain le pictiúr foirfe a fháil de na camaill seo ag ól amach as tobar i gCuáit. (D’fhág sé an ceamara faoin uisce agus d’úsáid sé cianrialtán leis an phictiúr a thógáil.)
Shunsuke Nakano/UPY 2025
Tógadh an grianghraf seo sa tSeapáin. Seo dhá iasc cheann caorach fhireanna ag troid mar gheall ar ghrúpa d’éisc cheann caorach bhaineanna. Beidh an buaiteoir ábalta fanacht agus beidh ar an chaillteoir imeacht leis agus grúpa eile de bhaineannaigh a aimsiú.
Robert Lehmann/UPY 2025
Thug an grianghrafadóir ‘Ceann amháin as 200,000’ ar an ghrianghraf seo. Is siorc tíograch é seo. Tá jab iontach tábhachtach ag an siorc tíograch i bhfarraigí an domhain ach gach bliain, maraíonn daoine thart ar 200,000 siorc tíograch mar seo. ‘Nuair a mharaímid siorc mar seo, déanaimid dochar don fharraige, agus déanaimid dochar dúinn féin nó bímid uilig ag brath ar an fharraige, bealach amháin nó bealach eile,’ arsa Robert. Deir Robert go gcuireann sé an-bhrón air nuair a thógann sé pictiúir mar seo.
Seo thíos rogha eile de na grianghraif a cuireadh isteach ar an chomórtas…
Eascann choncair i bhfolach i bpíosa de long bháite agus gliomach ina shuí taobh léi. Creid é nó ná creid, is maith le gliomaigh fanacht taobh leis na heascanna le píosaí d’éisc a thiteann amach as a mbéal a fháil – fad is go bhfuil siad mór go leor le nach n-íosfaidh an eascann iadsan!
Portán i bhfolach ar ancaire
Rick Ayrton/UPY 2025
Doingin mhara amach ó chósta Shasana
Giacomo AntonioRossi/UPY 2025
Ná bí buartha – tá siad ag cur rianaire ar an siorc tíograch óg seo le súil a choinneáil air. Tá na daoine seo ag iarraidh cuidiú leis na siorcanna.
Simon Temple/UPY 2025
Ochtapas amach ó chósta na Breataine. Tá siad seo le fáil go forleathan amach ó chósta na hÉireann fosta!
Henley Spiers/UPY 2025
Turtar marbh – is féidir a fheiceáil ón líne ar a chloigeann agus ar a bhlaosc gur mharaigh lián báid é
Bryant Turffs/UPY 2025
Iasc darb ainm an cnámhghainneach in Florida, Meiriceá
Alex Dawson/UPY 2025
Long bháite amach ó chósta na Túirce
Eduardo Acevedo/UPY 2025
Mairlín gorm amach ó chósta California. Tá sé iontach doiligh grianghraf maith a fháil den iasc seo agus é ag seilg bia nó tá an mairlín ar an dara hiasc ia gasta ar domhan!
James Rokop/UPY 2025
Is grianghrafadóir spóirt é James. Thóg sé an grianghraf seo de shnámhaí as Foireann Snámh Ealaíonta Mheiriceá agus í ag déanamh réidh roimh comórtas snámha. Thig leis na snámhaithe ealaíonta a n-anáil a choinneáil istigh tamall fada. ‘Seasann’ sí ag bun na linne snámha agus í ag déanamh réidh.
Lorincz Ferenc Lorinc/UPY 2025
Creid é nó ná creid, is fíor-ghrianghraf é seo. Seo breac agus bradán i loch san Ostair. Tá na bric go flúirseach in aibhneacha agus i lochanna na hÉireann. Tá bradáin againn fosta ach tá líon na mbradán i ndiaidh titim go mór le blianta beaga anuas.
Previous
Next
📷 Thug na moltóirí an chéad áit don ghrianghraf de na míolta móra dronnacha ag barr an ailt seo. An aontaíonn tú leis an rogha s’acu nó an fearr leatsa pictiúr eile? Mínigh do fhreagra.
📷 Cad é mar a mhothaigh tú faoin phictiúr de na hiascairí agus an siorc marbh nó faoin phictiúr den turtar marbh? Ar cheart dúinn na pictiúir sin a thaispeáint daoibh? Cén fáth?
📷 Sa lá atá inniu ann, bíonn teacht i bhfad níos fusa againn uilig ar cheamaraí maithe nó tá siad againn sna gutháin agus sna táibléid s’againn. Ar thóg tusa pictiúr maith den dúlra riamh nó ar mhaith leat ceann a thógáil? Ba bhreá linn é a fheiceáil!
Leathanach baile!
Leathanach baile nuachta
Léigh leabhar
Folláine
Faigh cúnamh