logo Nuacht Anois

 

Bréagáin anois agus i bhfad ó shin

Dé Céadaoin, an 27ú Samhain, 2024

Gach seans go bhfuil tú ag smaoineamh faoi bhréagáin na laethanta seo. Tá an Nollaig ag teannadh linn agus b’fhéidir go bhfuil do liosta chuig Daidí na Nollag scríofa agat cheana féin. An mbeidh bréagán ar bith ar do liosta i mbliana?


Tá a lán cineálacha difriúla bréagán ann, ar ndóigh. Sa lá inniu:

  • Tá bréagáin bhoga ann, cosúil le teidithe. 
  • Tá bréagáin eile ann a thógann tú (mar shampla Lego). 


  • Is maith le daoine eile bréagáin bheaga atá ina gcarachtair. 


  • Is fearr le páistí eile gléasanna agus bréagáin a bhaineann leis an chluichíocht. 


Ach, ar smaoinigh tú riamh faoi na cineálacha cluichí agus bréagán a bhí ag daoine fadó? Mar shampla, cad é lena mbíodh do thuismitheoirí nó do sheantuismitheoirí ag súgradh nuair a bhí siadsan óg?

An mbíonn tú ag súgradh le míreanna mearaí in am ar bith?


Gach seans go raibh teidí acu, nó tá teidithe ann mar bhréagáin le breis agus 120 bliain.


Sula raibh Lego ar díol sna siopaí, ba ghnách le páistí súgradh le bloicíní adhmaid.


Cluiche eile a bhí coitianta fadó ná mirlíní.


Bhí puipéid ag na páistí fadó, in amanna, agus thiocfadh leo scéal nó dráma beag a chumadh leo.


Bhí bábóga ag na cailíní, ach go háirithe, fadó. Mura raibh a lán airgid ag an teaghlach, rinne an mhamaí bábóg as ceirteacha, in amanna, dá páiste. Bhí corp bog solúbtha ag an bhábóg mar bhí sé déanta as éadaí amháin.

Thart faoi chéad bliain ó shin sa Ghearmáin, tháinig duine aníos leis an smaoineamh do mhaide agus sprionga air a chuidigh le daoine léim in airde. Maide Pógó a thug siad air.


Na céadta bliain ó shin, bhí teaghlaigh shaibhre ábalta bréagán iontach speisialta a cheannach - an capall luascáin. Rinne siúinéir an cruth den chapall a ghearradh as adhmad sula ndearna sé mín é. Ansin, phéinteáil duine eile an capall go deas.



Le plé nó le déanamh

  • Cé acu sórt bréagáin is fearr leat féin? Cad chuige?

  • Cuir ceist ar do thuismitheoirí nó ar do sheantuismitheoirí faoin Nollaig nuair a bhí siadsan óg. Cad é a rinne siad? Cad é a fuair siad mar bhronntanas? Scríobh scéal beag faoin Nollaig mar a bhí sí ag an am sin agus tarraing pictiúr le do scéal a léiriú.
  • Tá cuid de na bréagáin thuasluaite in úsáid againn leis na céadta bliain. Smaoinigh ar bhréagáin an lae inniu - an mairfidh bréagán ar bith acu sin chomh fada céanna, i do bharúil? Cé acu bréagán a mhairfidh sa todhchaí? Cad chuige, dar leat, a mairfidh sé i bhfad?
  • Déan cuntas ar na cineálacha bréagán atá ag na páistí i do rang. Léirigh na torthaí mar phicteagram nó mar ghraf.
  • Cuir an focal “bréagán” sa bharra cuardaigh ag barr an leathanaigh seo agus léigh cúpla alt eile le níos mó a fháil amach faoi na bréagáin.



Creidiúintí



meas