Cá háit a bhfuil tú ag iarraidh dul?
Tá Seachtain na hEolaíochta 2023 beagnach thart. Le seachtain anuas, ó cheann ceann na tíre, tá scoileanna ag dul as a mbealach le díriú isteach ar an eolaíocht, rud beag níos mó ná mar is gnách.
Bhí scoileanna ag déanamh turgnamh, ag clárú torthaí, ag tuar torthaí, ag fiosrú agus ag foghlaim.
Aithníonn scoileanna fud fad an domhain go bhfuil na hábhair eolaíochta ar fad iontach tábhachtach. Labhraíonn múinteoirí ar na hábhair ETIM – eolaíocht, teicneolaíocht, innealtóireacht agus mata.
Cad é atá an gasúr seo a dhéanamh?
Cuidíonn na hábhair seo linn…
Bíonn foghlaim eolaíochta iontach ag tarlú i scoileanna fud fad na tíre, agus ní le linn Sheachtain na hEolaíochta amháin. Cuid mhaith den am, áfach, ní chluineann duine ar bith eile fúithi ná ní fheiceann duine ar bith í.
Bealach amháin le bhur gcuid foghlama san eolaíocht a thaispeáint don saol mór ná tríd an chomórtas ReelLIFE SCIENCE
Ach, más mian libhse an dea-obair a bhíonn ar bun agaibh a chur ar taispeáint don chuid eile den tír, tá bealach amháin trína bhféadfadh sibh sin a dhéanamh, agus bheadh seans agaibh €1000 a bhuachan freisin! D’fhéadfadh sibh cur isteach ar chomórtas físeán Reel Life Science.
Scoil Mhuire, Ros Muc – an chéad scoil leis an chomórtas a bhaint, thiar in 2013
Is comórtas é seo atá oscailte don tír ar fad, thuaidh agus theas. Oibríonn tú in éineacht le do rang agus le do mhúinteoir le físeán ETIM 3 nóiméad a chur le chéile ar bhur rogha topaic.
Tá seantaithí ag Gaelscoil Riabhach ar an chomórtas a bhaint, seo iad thiar in 2016 lena seic €1000
Is fiú go mór breathnú ar na físeáin iontacha ag bun an ailt seo le smaointe a fháil i dtaca leis na cineálacha topaicí a chlúdaigh scoileanna eile thar na blianta. Tá leideanna eile ar fáil ó shuíomh idirlín Reel Life Science freisin.
Mar thúsphointe, breathnaígí ar an fhíseán seo, a mhíníonn an méid atá i gceist leis an chomórtas.
Cuireadh tús leis an chomórtas in 2013 agus go dtí seo tá chóir a bheith 700 scoil i ndiaidh cur isteach air. Is iad Gaelscoil Riabhach, as Baile Locha Riach, a bhain an comórtas ARÍS i mbliana (bhain siad an comórtas roinnt uaireanta!) le físeán thar a bheith tráthúil faoi bholcáin agus creathanna talún – maith iad!
Fuair Gaelscoil Riabhach an bua arís i mbliana – caithfidh sé go bhfuil siad saibhir faoin am seo!
Caith súil ar fhíseán Ghaelscoil Riabhach a bhain comórtas 2023…
Caith súil ar chuid de na físeáin iontacha ó Ghaelscoileanna eile thar na blianta…
Scoil Mhuire, Ros Muc, 2013
Scoil Náisiúnta Iognáid, Gaillimh, 2014
Gaelscoil Bhaile Mhunna, BÁC, 2015
Gaelscoil Riabhach, Gaillimh, 2015
Gaelscoil Riabhach, Gaillimh, 2016
Gaelscoil Riabhach, Gaillimh, 2017
Gaelscoil Riabhach, Gaillimh, 2018
Gaelscoil Riabhach, Gaillimh, 2019
Coláiste Ghobnait, Inis Oírr, 2021
Anois – an síleann sibh go bhféadfadh sibh féin an bhratach a choinneáil ar foluain don Ghaelscolaíocht i gcomórtas na bliana seo chugainn? Beidh iomaíocht ghéar ann!
Le plé/le déanamh
Breathnaígí ar na físeáin go léir. (Ní gá é a dhéanamh san aon am amháin, d’fhéadfadh sibh teacht ar ais chucu.)
Déanaigí liosta –
An féidir libh smaoineamh ar thopaic ar bith a chlúdaigh sibh féin sa rang, a bheadh maith don chomórtas seo?
Cén físeán is mó a thaitin libh agus cén fáth?
Tar éis duit bheith ag breathnú ar na físeáin, déan liosta de thrí rud nua atá foghlamtha agat.
Smaoinígí ar gach rud a bheadh de dhíth le físeán a dhéanamh
Leathanach baile!
Leathanach baile nuachta
Léigh leabhar
Folláine
Faigh cúnamh