logo Nuacht Anois

 

Brioscaí!

(pic le OLEG525/Shutterstock.com)

An maith leat brioscaí? Cad é an cineál briosca is fearr leat? Brioscaí seacláide? Brioscaí a bhfuil subh mhilis orthu (nó iontu)? Nó, an fearr leat briosca atá níos pléineáilte, cosúil leis na brioscaí sinséir? An ndearna tú brioscaí a bhácáil riamh thú féin? 

(pic le IC Production/Shutterstock.com)

An raibh a fhios agat nach ionann an focal “briosca” i Meiriceá agus an briosca a bhíonn againn ar an taobh seo den aigéan Atlantach? Cuirim i gcás, i S.A.M., is ionann "briosca" agus cineál de scóna pléineáilte. (Is minic a itheann Meiriceánaigh na “brioscaí” nó na scónaí sin ag am bricfeasta). Ach, an rud a dtugann muidne “briosca” air, tugann siadsan “cookie” air sin. 

(pic le Stephanie Frey/Shutterstock.com)


An raibh a fhios agat NACH briosca é an Jaffa cake? 

Ní briosca go hoifigiúil é, is císte beag é. An difear a bhíonn ann idir cístí agus brioscaí ná go dtosaíonn cistí amach go bog ach éiríonn siad tirim agus crua nuair a imíonn siad ó mhaith. Tarlaíonn a mhalairt ar fad do na brioscaí, áfach. Tosaíonn na brioscaí amach go tirim, briosc. Ach, éiríonn siad bog agus tais nuair a imíonn siad ó mhaith. 

(pic le NeydtStock/Shutterstock.com)

Tá stair idirnáisiúnta ag na brioscaí. Mar shampla, tagann an focal Béarla “biscuit” ón Fhraincis “bis-cuit” - focal a chiallaíonn go raibh sé bácáilte faoi dhó (rud a rinne cinnte de go mbeadh an briosca tirim agus briosc). 

                                  (Briseann briosca go furasta mar go mbíonn sé briosc. Pic le Hekla/Shutterstock.com)



Ach, cén uair i do bharúil a rinneadh an chéad bhriosca? Déarfainn go gcuirfeadh sé iontas ort a fháil amach go raibh daoine ag bácáil brioscaí fadó fadó, chomh fada siar le haimsir na Rómhánach, na nGréagach agus fiú chomh fada siar le himpireacht na nÉigipteach! Tá sé sin chóir a bheith cúig mhíle bliain ó shin! Ach, bhí na brioscaí ársa sin an-difriúil ar fad leis na brioscaí a bhíonn againn sa lá atá inniu ann! 

(D'ith na hÉigiptigh brioscaí chomh maith, ach bhí siad difriúil ó bhrioscaí an lae inniu. Pic le tan_tan/Shutterstock.com)


(Pic clúdaigh le AS Foodstudio/Shutterstock.com)


Le plé nó le déanamh

Cad é an cineál briosca is fearr leat agus cad chuige ar maith leat é?


Déan suirbhé ranga lena fháil amach cén sórt briosca is fearr le gach duine. Léirigh na torthaí i bhfoirm graif nó picteagraim.


Déan iarracht brioscaí a bhácáil (le cuidiú ó dhuine fásta). Inis do do rang cad é mar a éiríonn leat agus cén cineál briosca a dhéanann tú. 


meas